Mhe. Dkt. Jean Kaseya

Uwezo wa Afrika wa kulinda maisha ya akina mama, watoto wachanga, watoto na vijana balehe wake ni kipimo muhimu cha uhuru wake. Ajenda ya Usalama na Uhuru wa Afya wa Afrika (AHSS) inatambua kwamba bara imara lazima lifadhili, lisimamie na litoe huduma muhimu za afya ya msingi; liendeleze na kubakiza watumishi wake wa afya; litengeneze bidhaa muhimu za afya; na litumie data na mifumo ya kidijitali ya kuaminika kuongoza hatua.

Uhai wa mama na mtoto ni kiini cha ustahimilivu wa Afrika, rasilimali watu na maendeleo endelevu; hata hivyo vifo vya mama na mtoto vinabaki kuwa dharura ya afya inayoendelea zaidi, lakini kimya, ya Afrika. Afrika inachangia takribani asilimia 70 ya vifo vitokanavyo na uzazi duniani, karibu nusu ya vifo vyote vya watoto chini ya miaka mitano, na zaidi ya nusu ya watoto wasiopata dozi yoyote duniani. Vingi vya vifo hivi vinazuilika. Kipaumbele sasa ni kuhakikisha kwamba suluhisho zilizothibitika zinamfikia kila mwanamke, mtoto mchanga na mtoto, popote waishipo. Hatua za haraka zinahitajika.

Ramani ya Njia ya Kinara ya Afya ya Uzazi, ya Mama, ya Mtoto Mchanga, ya Mtoto na ya Balehe (2026–2030), chini ya uongozi wa Mhe. Dkt. Samia Suluhu Hassan, inatoa mwongozo wa hatua kwa wanawake, watoto wachanga, watoto na vijana balehe. Inaunganisha uongozi wa kisiasa wa ngazi ya juu na mifumo imara zaidi ya afya ya msingi, ufadhili endelevu, usalama wa bidhaa, mabadiliko ya kidijitali, na utoaji huduma wenye uwajibikaji.

Africa CDC kwa kushirikiana na Sekretarieti ya Kinara itasaidia uzalishaji na matumizi ya ushahidi unaojikita katika data iliyothibitishwa ya Nchi Wanachama, mabadiliko ya huduma za afya ya msingi na lishe jumuishi katika mnyororo wa RMNCAH, kuharakisha kwa bara watumishi wa afya ngazi ya jamii kuelekea wahudumu milioni mbili wa afya ngazi ya jamii wenye ujuzi mchanganyiko, usimamizi wa afya ya kidijitali, usalama wa bidhaa kupitia Mfumo wa Manunuzi ya Pamoja wa Afrika, na ufadhili wa ndani na mageuzi ya usimamizi wa fedha za umma.

Tunawaita serikali, washirika, asasi za kiraia, jamii, wasomi na sekta binafsi kuungana nyuma ya Ramani hii ya Njia. Kwa pamoja, lazima tujiongeze, Jiongeze Tuwavushe Salama, na kugeuza ahadi za kisiasa kuwa uhai, heshima na fursa kwa kila mwanamke, mtoto mchanga, mtoto na kijana balehe barani Afrika.